Lauhaizeta Akordeoi Orkestrak kontzertua emango du gaur, 20:30etan, Milagrosan. Emanaldi hori, Galiziara joan aurrekoa izango da, izan ere, bihar hara abiatuko dira, ostiral eta larunbatean kontzertu bana eskaintzeko hango lurretan.
Hainbat sari, 8 urtetan
Lauhaizeta Akordeoi Orkestra, Hernani, Irun, Lezo eta Mutrikuko musika eskoletako akordeoi ikasleek osatzen dute. Hainbat proiektutan elkarrekin aritu ondoren (EHME akordeoi orkestra) eta ikasleen goi maila eta gogoa ikusita, talde berri hau sortzea erabaki zen, Maribel Insausti, Josu Sarasa, Joxean Anduaga eta Julia Iriondoren gidaritzapean.
Lehenengo kontzertua Lezon eman zuten 2005ean. Arrakasta haundia lortu ondoren, beste hainbat kontzertu eman zituzten: Zarautz, Mutriku, Hernani, Donostia, Chillida Leku eta Bartzelonan.
Lorpenik haundiena, 2007ko Arrasateko Nazioarteko Akordeoi Lehiaketan, lehenengo saria lortu izan da, Akordeoi Orkestra mailan.
2008an, Italian, Castelfidardoko Nazioarteko Akordeoi Lehiaketan hirugarren saria lortu zuen Akordeoi Orkestra mailan.
2012an, Serbian, Kragujevac-eko Nazioarteko Akordeoi astean, sarrerako kontzertua eman zuen.