Auzitegi Nazionalak erabakiko du Kepa Pikabea preso hernaniarrari hirugarren gradua eman edo ez. Maite Goizueta emazteak Kronikari azaldu dioenez, iaz ukatu zion Espainiako Espetxe Zuzendaritzak Pikabeari hirugarren gradua ematea eta bere abokatuak helegitea aurkeztu zuen. Goizuetaren ustez, epaia laster iritsiko da eta aldekoa izango dela uste du. Dena dela, fiskalak errekurritu dezakeela gaineratu du. Kontua berria ez izan arren, azken egunetan ari da zeresana ematen.
Pikabeari bezala, Euskal Preso Politikoen Kolektiboa utzi eta Langraizko bidea deiturikoa jarraitu duten Iñaki Rekarte eta Aitor Bores presoei ere ukatu dizkiete euren eskaerak.
Astegunez ateratzeko aukera
Hirugarren graduarekin, Pikabeak astegunez kartzelatik ateratzeko aukera izango luke, lanera joateko edo formakuntza jasotzeko. Gaur egun, urtean, 36 egunetan kalera ateratzeko baimena izaten du: lehenengo sehilekoan 18 egun, eta bigarrengoan, beste hainbeste.