«Erri, erri, erri, Hernani euskaldunberri!». Hainbat oihuren artean hori, atzo Hernanin altuen entzun zena. Euskaldunberriei omenaldi beroa egin zien Hernanik, eta egunero egiten duten saiakera eskertu zien, eta denei gogorarazi, batzuek ikasteko, besteek ere lagundu egin behar dutela. Uholde haundi bat ekarri zuen atzo Korrikak Hernanira, jendetza ikaragarria baitzen kaleetan oihuka eta korrika. AEKk eskerrak eman nahi dizkie parte hartzaile eta laguntzaile guztiei, «bihotz-bihotzez».
Bide bazterrak leporaino ziren arratsaldeko 18:15etan, Korrika noiz iritsiko irrikan. Mandazubitik sartu zen Hernanira 18:45etan, eta Mugimendu Feminista izan zen aurreneko talde hernaniarra testigua hartzen. Herrian barrena beste 39 pertsonen eskuetatik pasa zen, eta elkarte, talde eta koadrilen izenean eraman zuten hauek, Martindegira arte. Atzetik, uholdea; ehundaka lagun, AEKri eta euskerari babesa emanez. Atzeko muturra ikusten ez zela ibili zen Korrika Hernanin gora eta behera, Kaxkoan, Lizeagan, Latsunbeberrin, Antziolan, Zinkoenean, Karabelen...
Hernanin barrena ordubeteko ibilbidea egin zuen Korrikak, eta Astigarragarako bidea Martindegitik hartu zuen. Korrika gaur iritsiko da helmugara, Baionara, 2.587 kilometro egin ostean; 12:30ak aldera izango da hori. Euskeraren aldeko festak jarraipena izango du ordea; gustu guztietarako ekitaldiak antolatu dituzte ekitaldia bukatzean.
Euskera ikasleei omenaldia, Korrika iritsi aurretik
Hernanin ere, Korrikaren alde! gisako aldarrikapenak oihukatu zituzten, ibilbidean zehar, baina batez ere batek hartu zuen protagonismoa: Erri, erri, erri, Hernani euskaldunberri! Euskaldunberriak omendu ditu aurten Korrikak, eta Hernanin Txantxillako errotondan jaso zuten egiten duten saiakeraren aitortza, ondo merezia. AEKko eta Banaiz Bagarako ikasleek eraman zuten testigua.
Argazkiak interneten,
asteartean
Hernaniko Kronikak ateratako argazki guztiak www.kronika.net web orrian egongo dira asteartean.