Kluben arteko txapelketarik garrantzitsuenetakoa aurkeztu zuten atzo: Berria Txapelketa. Hamargarren edizioa da aurtengoa eta Euskal Herriko 16 taldek hartuko dute parte, tartean, Hernanik: 5 Gipuzkoakoak dira, 4 Nafarroakoak, 4 Bizkaiakoak, 2 Arabakoak eta 1 Iparraldeko selekzioak osatua.
Hernaniko pelotariak,
partiduaren arabera
Maila guztietan ditu Hernanik maila haundiko pelotariak, beraz, partiduz partidu jakingo da zeinek jokatuko duen kanporaketa bakoitza; hala azaldu dio Rufino Rekaldek Kronikari: «partiduak zeinen kontra ditugun jakitean erabakiko dugu zein pelotarik jokatuko duten. Txapelketa hau kluben artekoa da, eta beraz, ez da hasieratik erabaki behar zein hiru bikotek jokatuko duten».
Zazpi Iturri eta Huarte,
faboritoak
Txapelketa irabazteko faboritoak zein diren galdetuta, argi du Rekaldek, Zazpi Iturri eta Huarte: «Zazpi Iturrik pelotari bikainak ditu maila guztietan, aurrean zein atzean. Lehendik ere Berria txapelketako finalak jokatutakoak eta irabazitakoak dira amezketarrak, eta aurten ere, ez dira urruti ibiliko. Beste faboritoa, ziurrenik, Huarte izango da. Nafarrek ere pelotari onak dituzte hiru mailetan, nahiz eta kadeteak ahulagoak diren».
Hernaniarren kasuan, partiduz partidu joan behar dutela dio Rekaldek: «maila onean ari bagara ere, poliki, partiduz partidu joan behar dugu. Kanporaketa bat pasatzen badugu, zoragarri. Eta bi pasatzen baditugu, askoz hobe. Jokatzen hasi eta ikusiko dugu benetan zein mailatan gauden».
Apirilaren 7tik
ekainaren 22ra,
16 kanporaketa
Final zortzirenetako partiduekin hasiko da txapelketa apirilaren 7an, eta kanporaketa, bi asteburuetan jokatuko da. Final laurdenetarako sailkatzen diren bikoteek 3 asteburutan eman beharko dute duten onena, finalerdietarako pasea lortzeko. Lau bikotek neurtuko dituzte indarrak azken txanpa horretan, eta bi onenek final haundia jokatuko dute ekainaren 22an. Urteroko legez, azken partidu hori Hernanin jokatuko da; eta aurten gainera, San Joan jaietako egitarauaren barruan sartu dute.
Finalaz gain, txapelketan jokatuko diren 16 kanporaketetako 5 ere kiroldegiko pelotalekuan jokatuko dira. Partiduen eguna ere, zehaztua dute: bi salbu, guztiak igandeetan jokatuko dira.
16 kluben partaidetza
Hernani
Zazpi iturri (Amezketa)
Aurrera saiaz (Bidegoien)
Oiarpe (Oiartzun)
Zestoa-Gazteleku (Andoain)
Oberena (Iruñea)
Erreka (Santesteban)
Huarte
Zugarralde (Burlata)
TXURUTA (Baztan)
markina
Lemoa
olaburu (Iurreta)
adiskide (Galdakao)
amurrio
zarama (Gasteiz)
iparralde