Aurten ere, bederatzigarrenez, Hernaniko Txistulari Jaialdia izango da asteburu honetan. Musika Eskolako txistulariek, Goizetik Hernaniko txistulari taldeak eta Euskal Herriko Txistulari Elkarteak antolatu dute jaialdia. Ohi bezala, jaialdiaren egitaraua bi egunekoa izango da eta gaur, Txistulari Gazteen Txapelketa jokatuko da. Lehia gogorra espero da, batez ere nagusienen kategorian, parte hartzaileen kopurua haundia baita eta aurkeztu dituzten obra edo doinuak zailtasuna dutenak baitira.
33 bakarlari eta 9 talde
Txapelketa Milagrosa kaperan izango da, goiz eta arratsalde. Goizean, 33 bakarlari ariko dira txistu eta danbolinaz: 12 urtetik beherakoen kategorian, 10 izango dira; eta 13-16 urte bitarteko kategorian, 23. Arratsaldez, berriz, 9 taldek joko dute. Denera, 9 eta 16 urte bitarteko 53 txistulari eta atabalari izango dira Hernanin. Ia Euskal Herri osotik etorriko dira euren lanak erakustera: Agurain, Atarrabia, Azpeitia, Bera, Bilbo, Doneztebe, Donostia, Durango, Gasteiz, Irun, Iruña, Orio, Pasai San Pedro, Tafalla eta Zestoatik etorriko dira.
Hernaniarrek ere hartuko dute parte. Hain zuzen, bertan izango dira: Ane Telletxea (bakarka) eta Akola taldea: Iraitz Apeztegia, Ane Telletxea, Maialen Eguren, Maddi Galarza, Ihintza Iriarte, Olatz Gonzalez, Ane Sanz eta Asier Ansa.
Epaimahaia, maila haundiko hiru txistularik osatuko dute: Txomin Agirregomezkorta, Ixiar Busselo eta Iñaki Sagardoik. Aurkezle lanetan, Leire Goñi ariko da.
Zortzi urtetan, 24 txapela
Orain arte ospatu diren 8 txapelketatan, hiruna kategoria jokatu direnez, 24 txapela dira banatu direnak: Iruñara 9, Irunera 4, Donostiara 3, Azpeitira 2, Gasteizera 2, Hernanira 2, Lizarrara 1 eta Bilbora 1.
Txistulari Topaketa eta Bandarekin kontzertua, bihar
Bihar, Txistulari Topaketa izango da. Inguruko txistulariak elkartu (Hernani, Astigarraga, Donostia, Lasarte, Pasaia...) eta herriko kale eta plazak girotzen ibiliko dira.
Aurten gainera, Musika Bandak ere kontzertua eman behar duela aprobetxatuz, Zipri Otxandorenaren batutapean, Musika Eskolako txistulariek hiru doinu eskainiko dituzte bandarekin. Txistulariek, Jon Ansorena izango dute buru.
Egitaraua
Gaur - Txistulari Gazteen Txapelketa:
11:00, Milagrosa kaperan: A kategoria (12 urte arteko
bakarlariak) eta B (13-16 urte bitarteko bakarlariak).
17:00, Milagrosa kaperan: D kategoria (taldeak) eta sari
banaketa.
Bihar - Txistulari Topaketa:
10:00, Elkartzea eta dianak
kaxkoan eta inguruko auzoetan.
12:00, Kalejira herriko kaxkoan.
13:00, Kontzertua udaletxeko arkupetan: Musika Banda, Musika Eskolako txistulariek lagunduta.
14:30, Lagunarteko bazkaria Santa Barbara elkartean.
18:00, Ttun-ttuna Plaza Berrin. Kalejira eta dantzarako doinuak (eguraldiak lagunduko ez balu, udaletxeko arkupetan).