Europako Giza Eskubideen Epaitegiak gaur erabaki dezake Parot Doktrina legezkoa den edo ez. Horrek hainbat eta hainbat preso jarri ditu Europara begira, erabakiak beren egoera erabat irauli baitezake; Hernanin bost dira Parot Doktrina aplikatu zaien presoak.
Ines del Rio presoaren kasua berraztertzen hasi
Europak gaur berriz aztertuko du Ines del Rio presoaren kasua, eta horrek eragin du sekulako ikusmina. Izan ere, 2012ko uztailean Europak Ines del Rioren kasua aztertu zuen, eta bertan esan zuen Parot Doktrinak ez zuela betetzen Europako Giza Eskubideen Hitzarmena. Espainiak errekurtsoa jarri zuen, eta gaur Europak berraztertu egingo behar du kasua. Alegia, 2012ko erabaki bera hartzen badu, Parot Doktrina berez atzera bota beharko luke Espainiako Gobernuak. Horrek esan nahi luke, ia 80 presori eragingo liokeela erabakiak, eta horietatik 54 presok zuzenean kalera atera beharko luketela.
Erabakia gaur, edo
hemendik egun batzutara
Berez gaur berraztertu beharreko kasua da, baina epaitegiak egunak pasa ditzake erabakia hartzen.
Ikusgai dago, Espainiak zer erabakiko duen
Espainiako Gobernuak berez onartu egin beharko luke Europako Epaitegiaren esana, eta hori horrela balitz, Pakito Lujanbio eta Inma Noble hernaniarrak kalera atera beharko lukete. Baina ikusgai dago Espainiak zer egingo duen. Hernaniko gainerako hiru presoek oraindik kartzelan segi beharko lukete, kondenaren hiru laurdenak betetzeko dituztelako. Horiek dira: Jose Javier Zabaleta Baldo, Asier Ormazabal, eta Kepa Pikabea.
Udalak dei egin du gaurko
manifestaziora joateko
Bi protesta ekitaldi izango dira gaur Hernanin, Parot Doktrinaren kontra. Eguerdiko 12:00etan, kontzentrazioa izango da Udaletxe aurrean, LABek deituta: Pakito, Inma, Baldo, Orma askatu. 197/2006 doktrina eten!! Arratsaldeko 20:00etan, manifestazioa deitu du Herrirak, «bizi arteko espetxe zigorraren kontra». Gudarien plazatik abiatuko da manifestazioa. Hernaniko Udalak ere dei egin du arratsaldeko manifestaziora azaltzeko.