2.587 kilometro egingo ditu aurten Korrikak, Andoaindik Baionara. Nafarroako herrietatik barrena dabil testigua momentu honetan, eta Hernanira ia Euskal Herri osoa igaro ondoren iritsiko da. Prebisioek diotenez, 18:48etan sartuko da Korrika Hernanin larunbatean. Urnietatik dator, eta Mandazubitik barrena iritsiko da herrira. Kaxkoa, Florida, Antziola, Latsunbe eta Lizeaga auzoetan barrena ibiliko da besteak beste, eta Astigarragarako norantza, Martindegitik barrena hartuko du. Eman euskara elkarri! da aurtengo lema, urte guzti hauetan AEKko ikasle izan diren guztiak omendu nahi baititu Korrikak. Hernanin hauek eta ehundaka herritarrek egingo dute bat larunbatean, testiguaren atzetik Korrika. Larunbata izaki, eta arratsaldez pasatzen dela aprobetxatuta, egun osoko festa antolatu dute gainera.
Goizetik arratsera,
euskeraren alde
Herriko talde eta elkarte ezberdinek antolatu dituzte Korrika eguneko ekitaldiak, herria girotzeko intentzioarekin. Gazte Txokoak goizeko 11:00etan gazteentzako gunea jarriko du Biterin. Marrazki lehiaketa, txapak egiteko aukera, punteria jolasak... etab izango dira bertan, besteak beste. Ordu berean, pelota partiduak jokatuko dira Tilosetan, Pelota Elkarteak antolatuta. Banaiz Bagara eta Kalez Kale kantari elkartekoek kantu jira egingo dute 12:00etan, kaleetan barrena.
Bazkarirako txartelak
erosteko azken eguna, gaur
Eguerdiko 14:00etan bazkaria antolatu dute. Menua: paella, oilaskoa, gazta eta kafea; edateko, Elutxetako sagardoa barrikotean; prezioa, 12 euro. Txartelak besteak beste, AEKn daude salgai eta gaur da erosteko azken eguna.
Ikasleei omenaldia,
Korrika pasa aurretik
Aipatu bezala, AEKko ikasleak dira aurtengo omenduak. Hernaniko ikasleek euren omenaldi partikularra 18:15etan jasoko dute, Txantxillako errotondan. Eta handik gutxira, 18:48ak aldera iritsiko da Korrika Hernanira.
Pasa ostean, festak segida izango du. San Joan Konpartsak erromeria antolatu du 20:00etan, Plaza Berrin.
Auzoetan ere, ekintzak
Herrigunean bakarrik ez, Orkolaga eta Martindegi auzoetan ere, antolatu dituzte Korrikaren aldeko ekitaldiak. Orkolagan haur jolasak, talo tailerra, toka txapelketa, bazkaria eta kontzertuak izango dira, iluntzera bitartean. Martindegin, haur eta gaztetxoentzat jolasak, Korrika pasa bitartean.
Igandean Baionan, bukaera
Astigarragatik Donostiarako bidea hartuko du Korrikak larunbatean. Iparraldera igandean iritsiko da, Hendaiatik barrena, Baionara. 12:30ak aldera bukatuko da; eta ondoren, ospakizunetarako nahikoa ekitaldi antolatu dituzte.