Aurreneko finala zuen atzo Hernanik, eta konbentzimendu horrekin atera ziren zelaira. Talde indartsua zuten aurrean, baina ez ziren kilkildu. Ez zen inor nabarmendu lehenengo 40 minutuetan; jokoa oso parekatua zen, eta markagailuak ere, hala erakusten zuen atsedenaldian; 7-7. Madrildarrak aurreratu ziren 23garren minutuan; eta hernaniarrek 2 minuturen faltan berdindu zuten: Olanok egin zuen entsaioa eta Genuak gauzatu. Ez zen nolanahiko jaurtiketa izan; bazter bazterretik transformatu zuen entsaioa.
Hernaniarren akatsak ondo aprobetxatu zituzten
Defentsan bi errore izan zituen Hernanik bigarren zati hasieran, eta madrildarrak adi egon ziren. Bi aukerak aprobetxatu, eta bi entsaio egin zituzten bigarren zatiko aurreneko 15 minutuetan. Golpe gogorra izan zen Hernanirentzat, eta handik aurrerako minutuak nahasiak izan ziren.
Neurketa amaitzeko zazpi minuturen faltan Garmendiak hernaniarren bigarren entsaioa lortu zuen, nahiz eta Genuak gauzatzerik ez izan. Saiatu ziren zuten guztia ematen, baina epailea ere, ez zuten lagun izan atzokoan. Bukatzeko minutu gutxiren faltan ez zioten Genuari entsaioa eman. Eta partiduaren hondarrean, madrildarrek azken entsaioa egin, eta bonusa lortu zuten; 12-25 bukatu zen neurketa.
Azkenaren kontra, igandean
Alikanteko La Vilaren kontra neurtuko dituzte indarrak datorren igandean. Borroka luzea dute oraindik maila mantentzeko; datorren partidua irabaztea da, hurrengo pausua.