Ohorezko hiru kofrade berri izendatuko ditu gaur `Tolare´ sagardoaren kofradiak: Joxe Mari Aizega, Pedro Santa Kruz eta Maider Unda. Aurreneko biak hernaniarrak dira; Pedro Santa Kruz betidanik aritu izan da sagardoaren munduan, eta Joxe Mari Aizega Basque Culinary Centerreko zuzendaria da. Maider Unda arabarra da, eta 2012ko olinpiadetan domina lortzeaz gain, familiaren baserriaz ere arduratzen da, ardiak zaintzen. Kofradiaren XVIII. kapitulua izango da gaurkoa, eta bertan, sagardoaren alde egingo dute zin kofrade berriek; eta aurrerantzean, honen alde lana egingo dutenaren konpromezua ere hartuko dute.
Egun osoko festa,
11:00etan hasita
Ongi etorria egingo diete goizeko 11:00etan Xalaparta elkartean. Ondoren, 12:15ak aldera, kale bueltan aterako dira hiru kofrade berriak, eta gainontzeko herrietatik etorritako 20 bat kofradietako kideak. Eguneko ekitaldi nagusia 13:00etan da, Biterin; zin egingo duten ekitaldia. Guztia bukatuta, Larre Gainen elkartuko dira, bazkaltzera.