Zenbait hondakin bereizi eta birziklatzerakoan, zalantzak izaten dira batzuetan. Zilarrezko papera nora bota behar da? Zer egin behar da zikindutako paperarekin? Nora bota arropak? Eta poliespana? Zalantza guzti horiek argitzeko, aplikazio bat atera dute, telefono mugikorretarako. Gaika izena du aplikazioak eta martxoaren 5etik dago martxan.
Bilketa sistema guztientzako aplikazioa
Gaika aplikazioak bilketa sistema mota guztietarako balio du, atez ateko sistema erabiltzen duten herrientzako edota 4 eta 5 edukiontzi dituzten herrientzako. «Birziklatzea da helburua», diote.
Ordutegiak eta egutegiak ere bai
Aplikazioak hondakin bakoitza nora bota argitzeaz gain, herri bakoitzak hondakinak biltzeko duen ordutegia eta egutegia ere erakusten du. Oraingoz, Hernani, Astigarraga, Oiartzun eta Usurbilgo informazioa lortu daiteke. Egun gutxi barru, Itsasondo, Legorreta eta Zaldibiko datuak jarriko dituzte eskura. Azken hiru herri horietan eta Astigarragan atez ateko sistema jarriko dute hemendik gutxira.
Oraingoz, Android sistemetan bakarrik
Aplikazioa Google Play dendan dago eskuragarri, doan. Oraingoz Android sistemetan bakarrik dago erabilgarri, nahiz eta iOS-entzako garapenarekin ere hasiak diren. Aplikazioa jaisteko eta informazio gehiagorako: gaikabilketa.blogspot.com.