Esku pelota zaleen gozamenerako, partiduz betetako asteburuak izango dira gaurtik aurrera. Izan ere, GRAVN Torneoa eta Buruntzaldeko Torneoa jarriko dira martxan gaur. GRAVN Torneorako, hau da, denboraldiko txapelketa ofizialik garrantzitsuenerako, 5 pelotari hernaniar aukeratu dituzte Gipuzkoako taldearekin jokatzeko: frontoian ariko dira Paul Ojuel, Ioritz Arrieta eta Aitor Gorrotxategi. Trinketean, berriz, Egoitz Altuna eta Ander Lopez ariko dira. Lehenengo neurketa, Arabaren aurka izango da.
Buruntzaldeko Torneoko 4 partidu, asteburuan
Buruntzaldeko Txapelketan Buruntzaldea eta Donostialdeako 9 taldek hartuko dute parte. Tartean izango dira hernaniarrak. Bi fasetan jokatuko da txapelketa eta lehenengoa, sailkapen fasea izango dena, ekaina erdira arte jokatuko da. Inguruko frontoietan jokatuko da. Azken fasea, berriz, Hernaniko pelotalekuan jokatuko da. Asteburu honetan, kadete, jubenil eta seniorrek ekingo diote txapelketari; denera, 47 bikotek. Aste Santua ondoren, berriz, benjamin, alebin eta infantilak sartuko dira. Hernaniarrek txapelketako lau partidu jokatuko dituzte gaur eta bihar. Bihar Hernanin izango dira, 11:00etan.
Ojuel, Mungiako finalean, bihar
Paul Ojuelek, Zabala bizkaitarrarekin, Mungiako Torneoko finala jokatuko du bihar, 11:30etan, Mungian. Larrañaga eta Kastillo izango dituzte aurrez aurre. Oso final parekatua espero da. Ojuel eta Zabalak 22-19 irabazi zieten Beitia eta Varelari finalaurdenetan eta 22-15 Mikel Rafael eta Irustari finalerdietan.