Ohorezko hiru kofrade berri izendatuko ditu igandean Tolare Gipuzkoako Sagardo Naturalaren kofradiak: Pedro Santa Kruz, Joxe Mari Aizega eta Maider Unda.
Egun osoko festa antolatu dute goizeko 11:00etan hasita. Ohorezko Kofrade berriei ongietorria egingo diete Xalaparta elkartean. Eguerdian, 12:15etan, kale buelta egingo dute Ohorezko Kofrade berriek eta baita etorritako kofradietako kideek ere. Ekitaldi nagusia eguerdiko 13:00etan izango da, Biterin. Agurra dantzatuko diete, eta ondoren egin beharko dute zin, sagardoaren alde. Ekitaldia bukatzean, Ozenki abesbatzak kantatuko du, eta amaitzean, Larre-Gain sagardotegian elkartuko dira guztiak, bazkaltzera.
Bi hernaniar
Pedro Santa Kruz eta Joxe Mari Aizega hernaniarrak dira bi hernaniarrak. Sagardoaren munduan betidanik aritua da Santa Kruz; Aizega Basque Culinary Centerreko zuzendaria da.
Maider Unda, arabarra da, Olaetakoa eta 2012ko Joko Olinpikoetan brontzezko domina lortu zuen, borrokan. Familiaren baserriaren kargua du, eta ardiak zaintzen ditu.