Sagardotegien ibilbidea da proposatzen den 11 ibilbideetako bat. Ibilbide erraza, bi ordutakoa, denek egiteko modukoa. Eta Hernaniko paraje esanguratsuenetako batzuk erakutsiko dizkiguna: sagardotegiak, sagarrondoak eta Urumea ibaia.
Portuan lonja, Urumean zubia, eta aurrerago, Cométe sarekoen oroigarria
Ibilbidea Portu auzoan hasten da, Lonja izeneko etxetik gertu (A). Garai batean lonja zen etxea da hau. Izan ere, Hernaniko baso eta burdinoletatik ateratzen zen egurra, ikatza eta burdina Donostiara eramateko modu bakarra, Portutik pasatzen ziren gabarrak erabiltzea zen. Aurrerago, Urumea ibaiaren (D) ertzetik pasatzen da bidea, eta puente kolgantea (E) ikusi daiteke; bakarra, gaur egun, azken uholdeek eraman egin baitzuten Elorrabikoa. Baina lehenago sartu zen zubi hau Hernaniko historian. 1978ko estropadak ikusteko (Hernaniko bandera), jende asko pilatu zen zubian, eta pisuaren ondorioz behera erori zen. Hainbat ikusle hil ziren. Bideari jarraituta, Hernaniko ezaugarri garrantzitsuak direnak ikusten dira: sagardotegi eta sagarrondoak (B). Bitxikeria moduan, Cométe sarekoen oroigarria (D) ere ikusi daiteke bidean, Osiñagan. Izan ere, 1939an, II. Mundu Gerran, pilotu britaniarrak naziengandik salbatzen laguntzeko Cométe sarea sortu zen. Tartean ibili ziren hainbat hernaniar ere, pilotuei Euskal Herriko Iparraldetik Hegoaldera pasatzen laguntzeko.
Sagarrondoak loretan, edo fruitua zintzilik
Ibilbidea maiatza bukaeran eginez gero, sagarrondoak loretan ikusiko ditugu, eta irailan, sagarrak zintzilik dituztela. Udazkenean zehar, berriz, sagardoa egiteko garaian, sagar usaina sumatzen da.
Ibilbidearen nondik-norakoak
l Ibilbideak 8,6 km ditu, 2 ordutan egiten da, eta 150 metroko desnibela du. Ez du zailtasun berezirik, eta mendiko bizikletaz ere egin daiteke. Gomendio bat; ura eraman, bidean ez baitago iturririk.
0. Ibilbidea Portu auzoan hasten da, Lonja izeneko etxetik gertu. Hemendik Osiñaga aldera hartu behar da.
1. Osiñagako puente kolgantea ezkerrera utzi eta aurrera segi, Loidi etxeraino. Hau ezkerrean utzi eta eskuineko bidea hartu.
2. Loidi etxea ezkerretara utzita, aurrera jarraitu, eta eskuinetara kurba egiten duen gunean bide nagusia utzi.
3. Ezkerretara aldapa gora ateratzen den harritxintxarrezko bidea hartu eta aldapa gora jarraitu, 200 metrora bidegurutze batekin topo egin arte.
4. Eskubira jo, argindar posteen norabidean. Bidea jarraitu eta ukuilu baten pareko pinuditik pasa. Harritxintxarrezko bidea zementuzko bide bihurtzen da hemen.
5. Bidegurutzearekin topo egindakoan, eskuinaldean Oindi ikusten da. Oindiren babesean dauden etxeetarantz jo; eskubi aldera, alegia.
6. Pardiolako bidegurutzera iristean, informazio-panelen artetik, ezkerrera hartu. Txabolategi baserri ondotik pasata, aurrera segi.
7. Lepatxikiko bidegurutzea da hau, ibilbidearen puntu altuena. Bide nagusia jarraituta, pinuen artetik beherantz doan bidea hartu.
8. Marka urdin eta zuriei jarraitu, bide nagusitik. Baserri multzo bat zeharkatu eta aldapa behera, Lastaola-berri baserriraino iristen da bidea.
9. Lastaola-berri oso-osorik inguratu, baserria ezkerrean utzita. Bertatik aldendu, aldapa gora, konifera multzo baten ondotik. Asfaltozko bide gorabeheratsua jarraitu sagarrondo artetik, negutegiak ondoan dituen gune zabal bateraino.
10. Bertan dago Elorrabi sagardotegia. Parean, ibaiertzeko zuhaitzen parean, Elorrabiko puente kolgantea zegoen tokia ikusten da. Asfaltozko bidea jarraituta, Iparragirre sagardotegiaren ondotik pasa.
11. Altzueta sagardotegira iritsi aurretik bidegurutze bat dago. Bertan, ezkerretara aldapa gora doan bidea utzi eta bide nagusia jarraitu, Loidira iritsi arte.
12. Ibilbide zirkularra ixten da hemen. Hasierako puntura jo, bukatzeko.
Ibilbidea PDF formatuan: www.kronika.net