Ibon Fernandez Iradi gaixotasun larri eta sendaezinak dituzten presoen zerrendara gehitu dute; hala jakinarazi zuen Etxeratek atzo, Aieteko Jauregian emandako prentsaurrean. Ibon Fernandez lasartearra da jaiotzez, baina urte luzez bizitu da Hernanin. Jaiki Hadi mediku elkarteak esklerosi anizkoitza diagnostikatu dio hernaniarrari. Lannemezan espetxean dago eta azaldu zutenez, gaixotasun honek berehalako tratamendua eskatzen du: «gaixotasun larri eta sendaezin honek hondamen fisiko eta psikologiko haundia sortzen du. Gaitzak pazientearen autonomia asko mugatzen du, bai areagotze progresiboagatik, eta baita tratamenduak eskatzen duen jarraipen estuagatik». Prentsaurrean gogoratu zuten, espetxeak eragin zuzena duela euren gaixotasunean, eta baita jaso dezaketen asistentzia medikuan ere: «beharrezkoa da asistentzia egokia, eta espetxeetako egiturek eta bertako bizi baldintzek ez dute hau ziurtatzen»
«Aske behar dute»
Senide eta lagunek gaixotasun hauek gertutik bizi dituztela gogoratu zuten. Hori horrela, azaldu zuten gaixotasun larri eta sendaezinak dituzten presoak aske behar dutela: «beraiek asistentzia egoki bat izateko, eta guk eurak merezi duten bezela zaintzeko».
14 preso zerrendan,
tartean 2 hernaniar
Ibon Fernandezen kasua gehituta, hamalau euskal preso politiko daude gaixo larri eta sendaezinen zerrendan. Horien artean da baita ere, Gari Arruarte, espondilitis gaixotasuna duen hernaniarra.
Gaixo dagoen beste preso baten berri ere eman zuten atzokoan: Ventura Tomé tafallarra. Prostatako minbizia aurkitu diote. Oraindik informeak falta zaizkie bere medikuei, baina baliteke Tomé ere gaixo larrien zerrendara gehitzea.