Jaitsierako postuei ihes egin ezinik jarraitzen du Mundarrok, aurreko asteburuan galdu ondoren. Porrot gogorra jaso zuten moreek Zarkumendegin (0-3), Santo Tomas Lizeoaren kontra; eta ez zuten joko onik erakutsi, gainera.
Horrekin, 12garren daude sailkapenean, 24 punturekin; bi gutxiago dauzka Dunboa Eguzkik, 14garrenak; eta 18 Rotetak, azkenaurrenak.
Beraz, astigartarrek ezin dute punturik barkatu, aurrerantzean, mailari eutsiko badiote. Eta puntuak pilatzen hasteko, gaur daukate aurreneko zita; erronka polita, gainera: Hernaniren kontrako derbia jokatuko dute, Zubipen, arratsaldeko 18:30etan.
Taldearen bertsio onena erakutsi behar, irabazteko
Baina garaipena lortu nahi badute, aurreko asteburuan egindako jokoa hobetu behar dute moreek. Izan ere, taldearen bertsio xinpleena erakutsi zuten. Aurreneko minutuetan egin zuen gola bere atean, eta gero, urrutiko bi jaurtiketekin jaso zituen beste bi gol.
Erasoan ere, ez ziren fin ibili astigartarrak. Aukera batzuk izan zituzten, baina ez zuten asmatu, atearen aurrean. Horiek dauzkate hobetu beharrekoak, gaur irabazteko!