Euskal Kantuzaleen Elkarteak antolatuta, aurten ere martxan da Haur eta Gaztetxoen Kantu Jaialdia. Helburua da, Nafarroan euskeraz abesteko dagoen ohitura sustatzea, eta horri eusten segitzen dutela erakutsiko dute gaurkoan Aranoko eta Goizuetako hiru taldek.
Sarrerak, salgai
Lesakan kantatuko dute, 18:00etako saioan, kultur etxean, eta sarrerak salgai daude 3 euroan, Tantirumairu ikastolan edo koordinazioa@oinez2017.ikastola.eus helbidean; 8 urtetik beheitikoek lekua gordetzeko txartela eskatu beharko dute, baina doan izanen dute.
Zazpi talde, gaurkoan
Aranoko taldea 6 eta 12 urte arteko gaztetxoek osatu dute, eta Esne Beltzaren Gogoak kantatuko dute. Horrez gain, asmatu duten bertsoren batekin ere emanen dute sorpresa.
Goizuetarren talde batek, berriz, 8 eta 12 urte artekoek osatutakoak, Alaitz eta Maiderren Amets bat kantatuko du; eta besteak, 12 eta 16 urte artekoenak, Hesianen Agortu dira hitzak.
Hiru talde horien saioez gain, beste laurekin gozatzeko aukera ere izanen da gaur; Lesakako hiru talderen emanaldiarekin, eta Azpilikuetako Enara Arregiren saioarekin.
Apirilean, jarraipena
Gaurkoan 150 haur espero direnez, 18:00etako saioaren ondoren, beste bat eginen da 19:00etan. Datorren astean segiko du jaialdiak, eta jaialdi nagusia apirilaren 29an eginen da, Tafallako kulturgunean.