Espainiako Txapelketan ikaragarrizko ibilbidea egiten ari da Ioritz Arrieta pelotari hernaniarra, Logroñoko Titin klubeko Gorriti nafarra bikote daukala. Azken faserako sailkatu dira, eta gaur bertan, final erdia jokatuko dute, Madrilen.
Finalerako, aukera haundia
Bi pelotariek maila haundia erakutsi dute orain arte txapelketan. Izan ere, jokatutako 10 partiduetatik 9 irabazi dituzte, eta bakarra galdu dute.
Gauzak horrela, gaurko finalerdirako aurreneko postuan sailkatu da bikotea.
Madrilen jokatuko dute gaur, final erdia; Colmenarren hain zuzen, Irurtzungo Ongay eta Bergara bikotearen kontra. Gaurkoan irabaziz gero, finala jokatuko lukete igandean bertan, beste final erdia duen klubaren kontra; San Cosme edo San Cristobal klubaren kontra.
Orain arte jokatutako 9 partidu irabazi dituzte, eta bakarra galdu.
Gipuzkoako finalean, Insausti eta Apaolaza
Bestalde, infantiletan, Gipuzkoako finala jokatuko dute gaur Xabier Apaolaza eta Oinatz Insausti hernaniarrek, 19:30etan Lazkaon, Mundarroko Lizeagatarren kontra.
Hauek ere sailkapen fase bikaina jokatu dute, 5 partidu irabazi eta bakarra galduta, baina astigartarrek ez diete erraz jarriko.