Partidu garrantzitsua zeukan Mundarrok, erregional preferenteen mailan, larunbatean; baina ez zuen bere jokorik onena erakutsi, eta porrota gogorra jaso zuen Santo Tomas Lizeoaren kontra, Zarkumendegin (0-3).
Aurreko asteburuan Urnietan bezalaxe, hasi eta berehala jaso zuten aurreneko gola moreek; bere atean sartu zuten, akats baten ondoren.
Eta gaizki hasi bazuten, ez zuten hobeto jarraitu astigartarrek; baina hala ere, berdintzeko zorian egon ziren, Gartziren oinetan. Ez zuen gola egitea lortu, ordea, eta hurrengo jokaldian, bigarrena sartu zuten donostiarrek, urrutiko jaurtiketa bati esker.
Aldaketak egin zituen entrenatzaileak atsedenaldian, eta hobeto ekin zioten bigarren zatiari. Baina berriro, hasi eta berehala egin zuen hirugarrena Santo Tomasek, urrutitik jaurtita hori ere. Horrekin bukatu ziren astigartarren esperantzak, eta saiatu baziren ere, ez ziren fin ibili atearen aurrean.
12garren, sailkapenean
Gauzak horrela, sei partidu falta direnean, 12garren daude. Kontrario zuzena izango dute asteburu honetan, mailari eusteko: Hernani, Zubipen.