Korrika Kulturalaren barruan, Irakurraldia antolatu dute aurten ere Berrialagunek. Bihar izango dira saioak arratsaldeko 18:30etan hasita. AEK euskaltegitik abiatuko dira ordu horretan eta herriko hiru tabernetan; Bodegan, Onddin eta Gurian, egingo dituzte irakurraldiak.
19:00etan egingo dute Bodegan, 19:30etan Onddin eta 20:00etan Gurian. Edonork irakurri ahal izango du nahi duen testua, baina baldintza bat jarri dute: ezin da bi minutu baino luzeagokoa izan. Musika eta bertsolariak ere ez dira faltako.
‘Erradikalak gara’ bertso antzerkia, martxoaren 30ean
Hernaniko 20. Korrika Kulturalari amaiera emateko Erradikalak gara bertso antzerkiaz gozatzeko aukera izango da. Martxoaren 30ean, 20:00etan, izango da Biteri kultur etxean. Helduei zuzendutako bertso antzerkia da; Beatriz Egizabal (antzerkilaria/ipuin kontalaria) eta Ane Labaka (bertsolaria) dira antzezleak.
Dagoeneko, zazpi euroren truke sarrerak salgai daude Hernaniko AEK euskaltegian. Egunean bertan Biterin ere sarrerak salgai jarriko dira.
Korrika amaierako ekitaldira autobusa 12 eurotan
Iruñeako 20. Korrika amaiera festara joateko autobusa antolatu da. Apirilaren 9an izango da eta 08:45etan irtengo da autobusa Atsegindegitik. Sarrerak salgai daude 12 euroren truke AEK euskaltegian.