Hiru arlotako dirulaguntzen deialdia, prest dauka Astigarragako Udalak: gizarte zerbitzuetakoak, berdintasunekoak eta kirolekoak.
Aurreneko bi arloetako dirulaguntzen oinarriak, aurreko astean onartu zituzten, martxoaren 15eko Tokiko Gobernu Batzordearen bileran. Hori horrela, berehala egingo du dirulaguntza deialdia, Udalak.
Kirol arloko dirulaguntzen oinarriak, berriz, dagoeneko bidalita daude Gipuzkoako Aldizkari Ofizialera, bertan argitaratzeko. Behin argitaratuta, udaletxeko erregistroan aurkeztu beharko dira eskaerak.
Gizarte zerbitzuetakoak, irabazi asmorik gabeko erakundeei zuzenduta
Gizarte zerbitzuetako dirulaguntzak eskatzeko, irabazi asmorik gabekoak izan beharko dute erakundeek, publikoak zein pribatuak: Astigarragako erakundeak, antolatutako jarduera edota jarduera esparrua Astigarragan bertan baldin badaukate; eta Gipuzkoa osokoak, baldin eta bere zerbitzuen onuradunen artean Astigarragako bizilagunak badaude, eta gizarte zerbitzuen arloan jarduten badute.
Kirol arloan, hiru dirulaguntza lerro
Kirol arloko dirulaguntzetan, berriz, hiru dirulaguntza lerro zabaldu dituzte: kirolariei zuzendutako dirulaguntzak, kirol ekintza puntualak antolatzekoak, eta kirol programak aurrera eraman ahal izateko laguntzak.