Ikaragarria izan zen, atzo Hernanik jokatu zuen partidua. Aurreneko minututik erakutsi zuten trikoloreek, ez zeudela Alcobendasi erraz jokatzen uzteko prest... eta jokatzen ere ez zioten utzi!
Nagusi izan ziren hernaniarrak, lokaztutako Landareko zelaian, eta garaipen haundia lortu zuten (26-0), ligako hirugarren sailkatua egurtuta.
Presio haundia kontrarioari, hasiera-hasieratik
Borrokarako prest atera ziren trikoloreak, eta hasiera-hasieratik, presio haundia egin zioten kontrarioari. Alcobendasen zelaian jokatu ziren minutu gehienak, eta presio horri esker, talde madrildarrak ezin izan zuen eroso jokatu eskura, eta akatsak egin zituen, baita ostikoetan ere.
Eta ezin hobeto aprobetxatu zituen Hernanik, akats horiek. Igor Genuak lortu zuen aurreneko entsaioa, bederatzigarren minutuan. Eta hortik aurrera ere, berdin jarraitu zuten, kontrarioari atseden tarterik eman gabe. Horrela iritsi zen bigarren entsaioa ere, Oier Garmendiaren eskutik, 24garrenean. Eta Genuak zigor kolpe bat pasa ondoren, hirugarrena ere lortu zuten hernaniarrek, atsedenaren aurretik (18-0).
Atsedenetik bueltan, emaitzari eustea zen hernaniarren lana, eta bikain aritu ziren. Alcobendas ezinean aritu zen bigarren zatian ere, eta Hernanik, erasoko bonuserako falta zuen entsaioa lortu zuen, Jon Ander Insaustiren eskutik. Beste zigor kolpe bat ere, pasa zuen Anartz Elosegik.
Sailkapenean, 10garren
Atzoko garaipen horrekin, gainera, pauso haundia eman du Hernanik, sailkapenean. Ciencias eta Bartzelona atzetik utzi, eta 10garren jarri da, Getxo hiru puntu aurretik duela.
Haiek baino partidu bat gutxiago dauka, gainera; datorren asteburuan jokatuko duena, Gernikaren kontra, Landaren bertan.