Korrika egunaren inguruko ekitaldiak gaurko antolatu dira Astigarragan. 20. Korrika Kulturalaren barruan goizeko 11:30etan, eguraldi ona egiten badu, Joseba Barandiaran plazan eta, eguraldi txarra egiten badu, frontoian, Xaguxar aisialdi taldeak haurrentzako eskulan tailerra antolatu du. Korrika gai bezalat hartua, herria apaintzeko eskulana egingo dute.
Jarraian, 13:00etan, Mundarro Kirol Elkartea eta Herri Eskolaren bidez, 20. Korrikako abestiaz baliatuz, koreografia bat dantzatzeko aukera izango du bertara gerturatzen den edonork. Goizari amaiera emateko, 13:30etan, sagardoa eta pintxo postua egongo da eta Aiztondo Abesbatza eta Kantuz taldea, herritarrekin arituko dira kantuan. Goiz osoan zehar, Korrikako materiala salgai egongo da.
Triki-poteoa eta bertso afaria, eguna borobiltzeko
Arratsaldez, berriz, triki-poteoari hasiera emango zaio, 19:30etan, Ekaitz tabernan. Maddi Roteta eta Leire Iturbe trikitilariek jarriko dute musika eta animazia 21:00ak bitarte. Eguna borobiltzeko bertso-afaria antolatu da. Azken hori, 21:00etan hasiko da Zipotzan. Herritar guztiak animatu nahi dituzte ekitaldietan parte hartu dezaten
Apirilaren 4an pasako da Astigarragatik
Otxandiotik Iruñearako bidea egingo du aurten Korrikak. Euskal Herri osoko bazter eta errepide ugari zeharkatuko ditu eta herri horietako bat izango da Astigarraga. Apirilaren 4an, asteartea, iritsiko da Astigarragara, Hernanitik barrena. Eguerdiko 11:44ak aldera iritsiko dela aurreikusi dute.
Kilometro erreserba dagoeneko, prest
Edizio guztietan bezala, aurten ere kilometroak erreserbatu eta erosteko aukera dute familia, elkarte, lagun koadrila eta abarrek... Urtarrilaren 23tik aurrera hasi ziren erreserbak egiten.