Emakumeen Nazioarteko Egunaren harira, Laga Gizarte Zerbitzuekin batera, antolatu zituen Goizuetako Udalak bi ekintza: Emakumeen Afaria egin zuten egunean bertan, martxoaren 8an, eta Zazpiak Oihal Batetik ipuin kontaketa musikatua izan zen hurrengo egunean, Amaia Elizagoian eta Olaia Inziarteren eskutik.
Adierazpena, Udalak
Horrez gain, adierazpen instituzionala ere, kaleratu zuen Udalak, egunean bertan. Hitzak ala ekintzak? Oraindik ere ez dago berdintasunik: feminismoa da bidea izenburupean, egungo egoeraren inguruko azterketa egiten dute: «oraindik ere bide luzea dugu lortzeko erabateko berdintasunean bizitzea». Horrez gain, bi konpromezu jartzen dizkiote beren buruari.
Batetik diote: «tokiko erakundeok berdintasun politikak bultzatzen jarraituko dugu, gure politika publiko guztietan berdintasun-printzipioa txertatuko dugu, eta emakumeen eta gizonen arteko berdintasuna lortzera bideratutako ekintzak abiaraziko ditugu».
Eta bestetik: «mugimendu feministaren eskariak eta borrokak bultzatuko ditugu».
«Berdintasun politikak bultzatzen jarraituko dugu [...] eta berdintasuna lortzera bideratutako ekintzak abiaraziko ditugu»
«Feminismoa da bidea»
Izan ere, Udalak azaldu du: «uste dugu feminismoa dela bidea biziki nahi dugun Berdintasuna lortzeko, emakumeak ahalduntzeko bizi-baldintza duinak eta desiragarriak sortzeko, eta emakumeok pertsona gisa dagozkigun eskubide nahiz aukera guztiak izan ditzagun».
Udalaren adierazpen instituzionala dio hori «giza eskubidea» dela, eta horretarako, «Emakumeen Nazioarteko Egunak aldarrikapen horiek aitortzeko oroitzapeneko eguna izan behar du, oraindik ere, emakumeak diskriminatu, ikusezin bihurtu eta zanpatu egiten dituen gizarte patriarkal batean bizi garelako».
Horren aurka, beraien ustez, «garrantzitsua da errealitatea onartzea, esatea, izendatzea, desberdintasunak ikusarazi eta horiek errotik deuseztatzeko lanarekin engainatzea... baina beharrezkotzat jotzen dugu jardutea, egitea».
Eta egite horren testuinguruan kokatzen dira, hain zuzen, Emakumeen Egunaren harira antolatu diren bi ekintza hauek: afaria, eta kontaketa.