Gipuzkoa, Bizkaia edota estatu mailako elkarteak bilduko dira bihar, goizeko 10:00etatik 14:30ak bitartean Atsegindegin, Hernanin antolatu den aurreneko Animalien Eskubideen Aldeko Jaialdian; Bubastis, Galgos112, Katubihotz, Kaonbi, SOS PPP España, Katuamets, Katueder, Baasgalgo, Tolosa Galgos, LadyGalga, Dogsecret eta Katuetxe-Sorabilla, besteak beste.
Azken horretako kideak dira, hain zuzen, Ainhoa Loinaz hernaniarra eta Idurre Serrano altzatarra. Biak, «animaliek erotuak!», diote.
«Harrera etxeak lortzea garrantzitsua da»
Aurreneko aldia da horrelako ekitaldi bat Hernanin egingo dena, baina antzeko asko egiten dira, bi boluntarioek azaldu dutenaren arabera. «Ekitaldi asko egiten dira, eta parte hartu izan dugu haietan. Horregatik, pentsatu genuen Hernanin ere probatu behar genuela. Baimenak eskatu eta eman egin dizkigute, eta ea zer moduz ateratzen den».
Bertan, noski, animaliek presentzia izango dute, baina ez animaliek bakarrik. «Helburua da animalien eskubideen aldeko elkarteak ezagutzera ematea. Boluntarioak gara kalean dauden animaliak erreskatatu, zaindu, jaten eman, edota osasun zaintza egiten diegunak, eta garrantzitsua da jendeak elkarte horiek ezagutzea, eta parte hartu dezaketela jakitea. Elkarte guztiak irabazi asmorik gabekoak dira, eta bakoitzak bere materiala erabiltzen du. Gastuak kubritzeko beharrezkoa da jendea. Era berean, oso garrantzitsua da kalean aurkitzen ditugun animalia horientzako harrera familiak topatzea. Guk etxeko kupoa beteta daukagu, animaliek erotuak gauzkate-eta!».
«Hernanin 200dik gora izan daitezke, kalean utzita dauden katuak»
Hernanin, bereziki, katuak
Estatuko beste leku batzuekin alderatuta, bi boluntarioen esanetan Euskal Herrian ez da hainbeste animalia abandonatzen. Hala ere, «Animalien Babeserako Elkartean txakur pilo bat» dagoela diote, eta «denboraldiaren araberakoa» izaten dela, bazterrean uzten den txakur kopurua.
Baina, Hernanin, bereziki, katuak daude kalean. «Guk hemen, Victor Hugo kalearen inguruan zaintzen ditugun katuen kolonia, 18-20 ingurukoa izango da. Esterilizatu egin ditugu. Baina herrian 200 edo gehiago izan daitezke!».
Era berean, «espezismoa» badagoela ere esaten dute. «Txakurrak eta katuak babesteko beharra errazago ikusten dugu, gure etxeko animaliak baitira. Baina zer gertatzen da, adibidez, jai-egun batzuetan behiak, txerriak eta abar luze bat Tilosetara ekartzen dituztenean? Ze behar dago, animalia horiek estres horretatik pasarazteko? Kontzientzia gutxi dago oraindik, baina hor gatoz gu, dosi bat ematera!».
«Aldatzen ari da, baina asko dago egiteko»
Hala ere, azken urteetan gizarteak animaliekiko daukan jarrera pixkanaka aldatzen ari dela onartzen dute.
Nabarmena izan da, adibidez, Hernanin eta Astigarragan egokitu diren guneak, txakurrak aske ibili daitezen. Edo Hernanin hartu diren erabakiak, festetako egun batean sokamuturra eta zezen txikiak kentzeko, edo animaliak erabiltzen dituzten zirkoak ez ekartzeko.
«Pixkanaka aldatzen ari da gizartea, baina oraindik asko dago egiteko. Legearen aurrean, adibidez, animaliak oraindik ‘gauzak’ dira, eta ez da kontuan hartzen izaki bizidunak direla. Era berean, PPP, gaizki katalogatutakoek, oraindik ere askatasun eta eskubide gutxiago dituzte. Udaletxeek egiten duten gauza bakarra izaten da, kaleko animaliak jaso, zaborra bailiran, baina ez dago babeserako plan bat. Eta zigorrak! Apenas dago zigorrik, animaliak egun osoan lotuta dauzkatenentzat, tratu txarrak ematen dizkietenentzat, kalean uzten dituztenentzat...».
«Legearen aurrean, animaliak oraindik ‘gauzak’ dira»
«Lagunak ez dira erosten»
Baina legeak aldatzeko presioa egitea ez da bakoitzak egin dezakeen gauza bakarra. «Harrera etxeek bizitza ematen digute», aitortzen dute.
Horren harira, animalien adopzioaren aldekoagoak direla azaldu dute, baina erostearen kontra ere ez daude. «Gure ustez, lagunak ez dira erosten. Errespetatu egin behar dira, eskubideak dituzte. Baina hori baino konplikatuagoa da, kontua. Izan ere, salgai dauden animaliak, dagoeneko jaio direnak dira, eta ez baditu inork erosten, kalera joango dira. Benetako arazoa, azkenean, legeetan dago, eta erregulazio faltan».
Denon ardura
Egoera horien guztien berri emango dute bihar, Atsegindegin bilduko diren elkarteek, eta espero dute jendea animatzea, gutxienez, informazioa eskatzera.
«Guk zaintzen ditugu kalean topatzen ditugun animaliak, baina ez dira gureak, denonak dira. Kontzientzia hartu behar dugu; animaliek ere bizitzeko eskubidea daukate, guk bezala. Izaki bizidunak dira».
Hain zuzen, ideia hori transmititzeko, mahai berezi bat ere jarriko da bihar; haurrena. Gizartearen kontzientzia aldatzen ari den seinale. Izan ere, hainbat umek eskulanak egin dituzte, eta biharko jaialdian salduko dituzte, bildutako dirua animaliei laguntzen dieten elkarteei bideratzeko. «Konfiantza osoa daukagu, etorkizuneko belaunaldietan».