Bete-beteta egongo al da gaur ere, Goiz Eguzkiko aretoa? Sekulako arrakasta izan zuen otsailean, Goiz Eguzki abesbatzaren 10garren urteurrena ospatzeko aurreneko kontzertuak. Eta gaur daukate bigarrena. Arratsaldeko 19:00etan hasita, Hernani Musika Eskolako Helduen Taldea igoko da taula gainera: Xabier Odriozola biolina jotzen, Elena Urruzola klarinetearekin, Iosune Marin gitarrarekin, Ina Idarreta flautarekin, Patri Arozena akordeoiarekin, eta Joxan Goikoetxea pianoa jotzen.
Hamabi pieza eskainiko dizkiete bertaratuei, eta bereziki, noski, Goiz Eguzki abesbatzari, bere urteurrenean. Horietako lau, gainera, Xabier Odriozolak berak konposatutakoak izango dira: emanaldiari hasiera emango diona, Portaletxoko; eta gaurko saioaren azkeneko hiru piezak, Haizearen Kolorea, Bidai Handia eta Itxaropena.
Barrikotea egoitzan, bihar arratsaldean
Beste zita bat ere jarri du Goiz Eguzkik, bihar arratsalderako. Barrikotea egingo dute, egoitzan bertan, 18:30etan hasita. Tiketak, egoitzako tabernan eskuratu daitezke.