Martxoaren 8a da gaur, Emakumeen Nazioarteko Eguna, hain zuzen, eta hori ospatzeko, egitarau berezia antolatu dute aurten ere Hernaniko Udalak eta Berdintasun Kontseiluak, Koordinadora Feministaren eta Bilgune Feministaren laguntzarekin. Atzo estreinatu zuten programa berezia Ovarios verdes fritos antzezlanarekin, eta gaur izango da aldarrikapen egun nagusiena. Ekintzak, ordea, ez dira hemen bukatuko eta martxoaren bukaerara arte izango dute luzapena, berdintasunaren aldeko aldarria herri guztian zehar zabaltzeko.
‘Marijira’ gaur, Plaza Berritik abiatuta
Marijira izaten da urtero aldarrikapen hori herriko Kaxkoan zehar zabaltzen duena, eta aurten ez da gutxiagorik izango. Jatorri, adin eta izaera desberdinetako emakumeek bat egingo dute, eta jai giroan, beraien presentzia eta eskubideak eramango dituzte kalera. Arratsaldeko 19:00etan abiatuko dira Plaza Berritik, trikitilari eta panderojoleen erritmoari segika.
Ovarios verdes fritos antzezlanarekin eman zitzaion hasiera atzo, Emakumeen Nazioarteko Eguneko egitarauari.
Mexikoko zapatistak eredu, beste urte batez
Aurreko urteko arrakastaren ondoren, Mexikoko mugimendu zapatistak feminismoari egindako ekarpenak izango dituzte hizpide, aurten ere. Zapatismoaren ekarpenak borroka feministara izenburuarekin, bihar eskainiko du hitzaldia gaiari buruz Cecilia Santiagok, Chiapaseko ekintzaileak. Arratsaldeko 19:00etan jarri dute zita Lumaltik GKEk eta Udalak, Biterin. Jakinarazi dute, baita ere, Santiagoren jatorria dela eta, hitzaldia gaztelaniaz izango dela.
Dokumentala eta solasaldia, etzi
Programa ofizialean agertzen ez bada ere, Bilgune Feministaren eskutik egingo da etziko solasaldia. En tránsito dokumentala jarriko dute aurrena, eta ondoren, solasean arituko dira gaiaren inguruan. Arratsaldeko 18:30etan hasiko da, Biterin.
Hitzaldia, kontzertua eta jaialdia, martxoa bukatzeko
Baina aste honetakoak ez dira ekintza bakarrak izango. Hitzaldia eta Kubako Duo Jade taldearen kontzertua izango dira martxoaren 28an, eta hurrengo egunean, aldiz, Zinegoak, gaylesbotrans nazioarteko zinema eta arte eszenikoen jaialdia izango da. Biterin izango dira biak, arratsaldeko 19:00etan.
EMAKUMEEN NAZIOARTEKO EGUNA: PROGRAMA OSOA
Gaur, martxoak 8
19:00 Marijira. Plaza Berritik abiatuta. Antolatzailea: Hernaniko Koordinadora Feminista.
Bihar, martxoak 9
19:00 Hitzaldia: Zapatismoaren ekarpenak borroka feministara. Hizlaria: Cecilia Santiago, Chiapaseko ekintzailea. Biteri kultur etxean. Gaztelaniaz. Antolatzaileak: Lumaltik GKE eta Hernaniko Udala.
Etzi, martxoak 10
18:30 Dokumentala eta solasaldia: En tránsito. Biteri kultur etxean Antolatzailea: Hernaniko Bilgune Feminista.
Martxoak 28, asteartea
19:00 Hitzaldia eta kontzertua: Duo jade. Kubatar emakumeen ekarpena Kubako musika eta herrialdearen garapenean. Biteri kultur etxean. Doan. Antolatzaileak: Berdintasun Kontseilua eta Hernaniko Udala.
Martxoak 29, asteazkena
19:00 Zinegoak, gaylesbotrans nazioarteko zinema eta arte eszenikoen jaialdia. Biteri kultur etxean. Doan. Antolatzaileak: Berdintasun Kontseilua eta Hernaniko Udala.