Bizikidetza eraikitzen jarraitzeko helburuarekin, Elkarbizi 2017rako programazioa gaur bertan hasiko da Astigarragan. Arizmendiarrietaren eredua: zatiketa politikoari aurre egiteko, elkarlana izenburua duen ikastaroak irekiko du Elkarbizi taldearen ikasturtea. Arratsaldeko 19:00etan izango da, kultur etxean.
Arizmendiarrietaren lana aztertzea, helburu
Pako Etxebeste Arizmendiarrieta Fundazioaren kontseilariak aurkeztuko du Arizmendiarrieta beraren ondarea. Hain justu, Arrasaten jardun zen denboran zehar egindako lana aztertzea izango da ikastaroaren helburua.
Elkarbizik azaldu duenez, «bertara iritsi zenean, herria hondatuta eta zeharo zatituta aurkitu zuen». Horrela, «elkarlanaren mezua zabalduz, emaitza ederrak lortu zituen Arrasateko bizitzaren zenbait arlotan».
Guztira sei ikastaro izango dira
Arizmendiarrietarena sei ikastaroetatik lehenengoa izango da. Martxotik urrira bitartean, Astigarragan, Lasarten, Hernanin, Urnietan eta Andoainen antolatu ditu Elkarbizi taldeak.
Izena ematea, ezinbestekoa
Elkarbizi bailarako ekimenak jakinarazi duenaren arabera, ikastaroetan parte hartzea irekia eta debaldekoa izango da, baina plazak mugatuak direnez, izena ematea ezinbestekoa izango da. Horretarako: ganboiturri@gmail.com. Hurrengo hiru ikastaroetan, tormentuaren memoria osoaren inguruan arituko dira hizlariak.