20. Korrika kulturala dela eta, datorren larunbatean, hilak 11, Astigarragan Korrika eguna antolatu dute herriko hainbat eragilek. Goizez, 11:30etan, eguraldi ona egiten badu, Joseba Barandiaran plazan eta, eguraldi txarra egiten badu, frontoian, Xaguxarrek haurrentzako eskulan tailerra antolatu du eta, Korrika gaitzat hartua, herria apaintzeko eskulana egingo dute.
Jarraian, 13:00etan, Mundarro Kirol Elkartea eta Herri Eskolaren bidez, 20. Korrikako abestiaz baliatuz, koreografia bat dantzatzeko aukera izango du bertara gerturatzen den edonork.
Goizari amaiera emateko, 13:30etan, sagardoa eta pintxo postua egongo da eta Aiztondo Abesbatzakoak arituko dira kantuan. Esan beharra dago, goiz osoan zehar, Korrikako materiala salgai egongo dela.
Triki-poteoa eta bertso afaria eguna borobiltzeko
Arratsaldez, berriz, triki-poteoari hasiera emango zaio, 19:30etan, Ekaitz tabernan. Maddi Roteta eta Leire Iturbe trikitilariak jarri dute musika eta animazia 21:00ak bitarte. Eguna borobiltzeko bertso-afaria antolatu da.
Azken hori 21:00etan hasiko da Zipotzan, bertara joan nahi duenak 18 euroren truke sarrerak salgai ditu, AEKn, Zipotzan eta Ikatzan. Antolakuntzatik herritar guztiak animatu nahi dira ekitaldietan parte hartu dezaten.