Ekintzaz ekintza dabiltza Goiz Eguzkin, eta datozen egunetan ere, jarri dituzte hainbat zita; horietako bi, aste honetan.
Ostiralean izango da aurrenekoa, eta segida emango die, Goiz Eguzki abesbatzaren 10garren urteurreneko ospakizunei. Arratsaldeko 19:00etan hasita, kontzertua eskainiko du Goiz Eguzkin bertan, Hernani Musika Eskolako Helduen Taldeak. Guztira, hamabi pieza eskainiko dituzte; horietako lau, Xabier Odriozola hernaniarrak konposatutakoak.
Xabier Odriozola bera ariko da biolina jotzen; Elena Urruzola klarinetearekin; Iosune Marin gitarrarekin; Ina Idarreta flauta jotzen; Patri Arozena akordeoiarekin; eta Joxan Goikoetxea pianoa jotzen.
Barrikotea larunbat honetan; babarrun jatea hurrengoan
Larunbatean, berriz, barrikotea antolatu dute egoitzan. Tiketak egunean bertan jarriko dituzte salgai, arratsaldeko 18:30etatik aurrera, egoitzako tabernan.
Eta hurrengo larunbaterako ere, dagoeneko jarri dute zita: babarrun jatea egingo dute, eguerdiko 14:00etan. Tiketak, egoitzako tabernan egongo dira eskuragarri.
Paco Goya presidente, beste urte batez
Bestalde, otsailaren 21ean egin zuten Goiz Eguzkiko bazkideek, urteko batzarra. Bertan landu ziren urteko ekintzak eta proiektuak, eta erabaki zuten, aho batez, Paco Goyak jarraitzea presidente bezala. Konfiantza hori eskertu zuen Goyak.