Bi zita jarri dituzte Nabarraldek eta Hernani Errotzenek, bi aste hauetarako; eta biak ere, elkarrekin lotura estua dutenak. Izan ere, datorren astelehenean eskainiko dute Atxorrotx izeneko dokumentala, Biterin; eta horren aurrerapena egingo du gaur, Angel Rekalde soziologoak: Oroimen tokiak hitzaldia emango du, Biterin bertan, arratsaldeko 19:30etan hasita.
Rekalde bera da dokumentalaren egileetako bat, eta aurkezpena egingo du: «tenentzia bat zen Atxorrotx, eta historia pila bat zegoen horren atzean ahaztuta», azaldu du.
Hain justu, hori izango du hitzaldiaren muina, ahaztuta dauden memoriagune historikoak: «Euskal Herrian memoriagune garrantzitsuak daude, erabat ahaztuta eta baztertuta, eta merezi du berreskuratzea».
Atxorrotx eta Beloaga gazteluak, hizpide
Hainbat memoriagune aipatuko ditu hitzaldian, baina bi azalduko ditu zabalago: Atxorrotx bera, eta Beloaga gaztelua, Oiartzungo Arkalen dagoena: «bertan ere, Atxorrotxen bezala, historia pila bat dago ahaztuta, erromatarren garaikoa, Nafarroako garaikoa, karlistadetakoa... Asmoa daukagu, horri buruz ere lan bat egitekoa», aurreratu du.