Martxoaren 8a da bihar, egun seinalatua: Emakumeen Nazioarteko Eguna. Eta horren bueltan, makina bat ekintza antolatu dituzte Hernanin; aurrenekoa, gaur bertan izango da. Antzerki saioa eskainiko dute Biterin, arratsaldeko 19:00etan hasita: Ovarios verdes fritos.
Detritus Teatrus konpainiak emango du, gaztelaniaz, Berdintasun Kontseiluak eta Hernaniko Udalak antolatuta. Sarrera doan izango da.
Makina bat ekintza antolatu dituzte, martxoaren 8aren bueltan. Kronikak, berriz, ale berezia argitaratuko du.
Antzezlanean, Mastur Batetu Catalina doktorea izango da protagonista. Memoria eta pixa galeretan aditua da, eta programa bat jarriko du martxan, oinarri hartuta arazo horietako bat konponduz gero, besteak ere hobera egingo duela. Horren bueltan, antzezlan probokatzailea, apurtzailea eta dibertigarria prestatu du Belen Nevado aktore eta zuzendariak.
Kronikak ale berezia bihar, martxoaren 8aren bueltan
Bihar, berriz, Marijira antolatu du Koordinadora Feministak, 19:00etan Plaza Berritik abiatuta.
Eta bihar bertan, ale berezia argitaratuko du Kronikak. 24 orrialdeko egunkaria izango da martxoaren 8koa, eta horietatik 16 orrialde, izango dira Emakumeen Nazioarteko Egunaren inguruko gehigarri bereziari eskainitakoak. Bertan jaso ditu Kronikak, besteak beste, Urumea bailarako emakumeei elkarrizketak, eta berdintasunaren arloan martxan dauden mugimenduak.