Martxoaren 30ean abiatuko da Korrikaren 20garren edizioa Otxandiotik (Araba), eta apirilaren 4an pasako da Astigarragatik. Ordura arteko bidea leuntzeko eta herria girotzen hasteko, Korrika Eguna izango da gaur zortzi, Korrika Kulturalaren programaren barruan.
Herriko hainbat eragileen laguntzaz, egun osoko festa egingo dute Joseba Barandiaran plazan: goizeko 11:30etan hasiko da, eta gauera arte luzatuko da, bertso afariarekin.
Lau talde, egitarau zabala aurrera eramateko
Goizeko 11:30etan hasiko da festa Xaguxar aisialdi taldeak eta AEK euskaltegia berak egingo duten eskulan tailerrarekin. Hori bukatuta, 13:00ak aldera, Junp Fit eta lurreko dantzan ibiltzeko aukera izango da, Mundarroren eskutik. Eta eguerdian, sabela nolabait betetzeko, luntxa egingo dute, herritarrek Aiztondo abesbatzaren ahotsekin gozatzen duten bitartean. Korrikako materiala ere egongo da salgai, goiz osoan zehar.
19:30etan hasiko dira arratsaldeko ekintzak Maddi Roteta eta Leire Iturbek girotutako triki-poteoarekin. Eta azkenik, 21:00etan hasiko da bertso afaria Zipotza elkartean. Bertan afaltzeko txartela erosi beharko da aurrez, Zipotzan, Ikatzan edo kultur etxean, 18 euroan.