Azkeneko Gizarte Zerbitzuen eta giza eskubideen batzordean hala onartuta, 17.454,26 euro bideratuko ditu Udalak gatazkak bizi dituzten herrialdeen alde lanean ari diren elkarteei. Alde batetik, siriar errefuxiatuekin lan egiten dutenei emango zaie dirulaguntza; eta bestetik, saharar kanpamenduetara laguntza bideratzen dutenei.
Siriar errefuxiatuen alde, diru kopuru altuena
Udalak azaldu duenez, Zaporeak proiektuari eta Salvamento Marítimo elkarteari emango zaie diru kopuru altuena, siriar errefuxiatuekin Greziako Chios herrian egiten ari diren lanarengatik: «Elkartasun Zaporeak proiektua Intxaurrondoko Gastronomia Elkarteko kideen ekimena izan zen, eta 2016ko martxoan eman zituen aurreneko pausuak. Gaur egun 15 boluntariok egiten dute lan Chiosen dauden errefuxiatu siriarrekin, eta 1.200 otordu ematen dituzte egunero», arrazoitu du Udalak.
Dena den, azaldu dutenez, «kopururik haundiena Chioseko elkartasun proiektuari emango zaion arren, Saharako errefuxiatuei elikagaiak emateko premiazko laguntza ere, kontuan hartu da». Horregatik, Saharako errefuxiatuen aldeko karabanari emango diote laguntzaren beste zatia.
Saharar errefuxiatuei, ere bai
Horrela, beraz, Sahararen aldeko 13garren Euskal Karabana ere diruz lagunduko du; hain zuzen Piztu itxaropena larrialdi proiektuaren lana sustatzeko egingo du ekarpena Udalak. Horri esker, «Euskal Herriko herrietan janariak eta segurtasun gaiak bilduko dira desnutrizioak eragindako patologiak eta gaixotasunak gutxitzeko».
«Konpromiso irmoa»
EH Bilduk salatutakoaren harira, Udal gobernuak argi dio beraiek «konpromiso irmoa» dutela «gatazkak bizi dituzten herrialdeekin», eta aipatutako dirulaguntzak onartzerakoan EH Bilduren «babes osoa» izan dutela.