Asteazkenean aurkeztu zuten OasisLab parte-hartze proiektua Hernanin, Emanhar Elkarteak, Ede Fundazioak eta Kiribil Sareak, eta dagoeneko, eman dute izena 15 herritarrek, Hego Ameriketatik datorren Oasis metodologian oinarrituta, hernaniarren ametsa irudikatu eta auzolanean egi bihurtzeko.
Beste 15entzako dago tokia, eta martxoaren 13ra arte eman dezakete izena: 677 662 637, info@emanhar.org edo www.emanhar.org.
Beste 15 lagunek eman dezakete izena, martxoaren 13ra arte.
Txinparta piztea
Proiektuan parte hartzera animatzen diren 30 herritarrek taldea osatuko dute, eta Hernanin dauden baliabide eta talentu edo ezaugarri onak identifikatuko dituzte, «falta zaiguna ikusi beharrean, daukagun horretan jarriz arreta», azaldu dute koordintzaileek.
Ondoren, taldeko kideek elkar ezagutuko dute eta nork bere bizipenak kontatuko ditu, talde bateratua sortzeko. Horrela, herri talde-ametsa bilatzeari ekingo diote, Hernaniko amets kolektiboa identifikatzeko, eta hura errealitate bihurtzeko planifikazioa egingo dute. Auzolanean, elkarlanean beteko dute plana, eta azken lana izango da, lortutako eraldaketa ospatzea eta hausnarketa egitea.
Guztia, hiru asteburu eta egun batean egingo dute; martxoaren 17-19an, martxoaren 24-26an, apirilaren 1-2an eta apirilaren 7an.
Koordinatzaileen esanetan, «azkar egingo den prozesu bat da, txinparta bat», eta helburua izango da «herritarrek daukaten ahalmena ikusteko aukera sortzea». Horrela, parte hartzera animatzeko deia luzatu dute.