Atzo aurkeztu zuten Galarretan, Erremonteko Sagardoaren Txapelketa, eta gaur jokatuko da aurreneko partidua, 16:00etan hasita jokatuko direnetan bigarrena; Ezkurra-Aizpuru III Altzueta ordezkatzen, Petritegiren izenean ariko diren Otaegi-Ionen kontra.
Barrenetxea IV, bueltan
Beste sei bikotek hartuko dute parte txapelketan; tartean, Barrenetxea IV hernaniarrak. Gaur bertan bueltatuko da kantxara, partidu estelarrean, bi hilabetez bajan egon ondoren; Utergarekin jokatuko du, Urriza eta Agirrezabalaren kontra.
Sagardoaren Txapelketan, berriz, Oialume Zar ordezkatuko du, Ezkurra IIrekin. Gurutzetaren izenean jokatuko dute Etxeberria IVk eta Etxeberria IIIk; Larre-Gainen izenean, Urriza eta Azpirozek; Bereziartuarenean, Zeberio IIk eta Agirrezabalak; Gaztañagaren izenean, Uterga eta Larrañagak; eta Setienenean, Ansa IIk eta Endikak.
Finala, apirilaren 29an
Gaur hasiko den ligaxka ostegun eta larunbatetan jokatuko da, martxoaren 25era arte. 4 puntu lortuko dituzte partiduak irabazten dituztenek; 2, 36-39 tanto egiten dituztenek; bakarra, 32-35 artean eginda; eta bat ere ez, hortik behera.
Apirilaren 1etik 22ra, azken fasea jokatuko da: apirilaren 1 eta 6an, final zortzirenak; apirilaren 8 eta 13an, final laurdenak; eta apirilaren 15 eta 22an, final erdiak.
Finala, berriz, apirilaren 29an jokatuko da.