Datorren asteko larunbatean, martxoaren 4an, Karabelen, auzolana antolatu dute Aranzadi zientzia elkarteko lagunek Karabeleko Etxaldea baratze eremuan. Aranzadikoek sortu nahi duten anfibio, sugandilla zein sorgin-orratzentzako babesgunea sustatzeko kanpaina baten barruan kokatzen da. Anfibio, narrasti, sorgin-orratz eta burruntziak kontserbatzea da helburua eta Eusko Jaurlaritzak sustatuta da.
Odonatoak (sorgin-orratz zein burruntziak), anfibioen antzera, inguru urtarretara hertsiki lotuta daude. Hezegune hauek babestuta, euren kontserbazioan lagun dezake. Horregatik, Aranzadiko kideek gidatutako auzolanean hezegune bat sortuko dute Karabelekon, ekimenean parte har nahi duten guztiekin.
Bertan parte nahi duen orok 943 466 142 telefonoan izen eman dezake.
Odonatuek hezeguneak behar dituzte
Aranzadi Zientzia Elkarteko kideetako batek, Iñaki Mezquitak, hain zuzen, aipatutako Odonatuen inguruan azalpenak ematen ditu. Horren inguruan dio: «burruntziak intsektu hegalariak dira, intsektu helduak direnean (ugaltzeko gai direnean): sei hanka dituzte, lau hego, bi begi konposatu eta buruan bi antena txiki ere bai. Sorgin-orratzak txikiak eta lirainak dira, hegoak bizkarrean bilduta posatzen dira eta itxura luzexka dute».