Aranzadi Zientzia Elkarteak hezegune edo putzu bat sortu nahi du Karabeleko Ekonekazaritza Etxaldean, lehenago Zepadin, Akolan edota Usokon egin duen bezala. Helburua da anfibio, sugandilla edota sorgin-orratzentzako babesgune bat sortzea.
Horretarako, auzolan eguna deitu dute larunbaterako, 09:30etan. Lana antolatzeko, aurretik izena emateko gomendatu dute, 943 46 61 42 telefonoan.
Hezeguneaz gain, zuhaitzak
Dagoeneko prestatu dute putzua egiteko tokia, eta Karabelekoko Oier Iurramendi, Amaia Odriozola eta Eneko Arakama langileak ere prest daude, auzolan eguna aprobetxatuta, zuhaitz autoktonoak landatzeko.
«Hezegunea sortuko den tokian baso moduko bat dago, baina kanpoko zuhaitzak daude bertan. Asmoa da urtero 30 bat zuhaitz autoktono landatzea, bertako landaredia berreskuratzeko. Larunbat honetan, urkiak eta altzak landatuko ditugu».
Hitzaldi txikiak eta auzolana
Larunbatean Aranzadi Zientzia Elkarteko kideak izango dira Karabelekon, bertan egin nahi dena azaltzeko. Karabelekoko langileen esanetan, asmoa da «anfibio, narrasti, eta sorgin-orratz edo burruntzien habitat naturala berreskuratzea, populazioa mantentzeko. Izan ere, bizitoki natural asko suntsitu dira, eta behera egin du populazioak». Hain zuzen, habitat hori berreskuratzeko aukeratu da Karabelekoko gune hau. «Hezeguneak babesa eta itzala behar du, eta hau leku aproposa da». Fauna eta flora berreskuratuko dira, beraz.