Emakume kirolarien ahaleginak eta horien alde egindako lana aintzat hartu eta nabarmentzeko sortu zuen iaz Foru Aldundiak Carmen Adarraga saria. Aurten, martxoaren 7an, Emakumeen Nazioarteko Egunaren bezperan, Ideo Oronan egingo den ekitaldian, Mari Ayestaran hockey jokalari eta entrenatzaileak jasoko du saria.
Kirolari donostiarra, hain zuzen, gakoa izan da Real Sociedaden emakumezkoen hockey taldearen historian, jokalari bezala aurrena eta entrenatzaile gisa gero.
Jokalari zela, Espainiako selekzioak 1971etik 1984ra bitartean jokatu zituen partidu guztietan hartu zuen parte, eta nazioarteko 89 partidu ofizial jokatu zituen Ayestaranek (Europako txapelketak, mundukoak, lagun artekoak...).
Arrakasta ugari pilatu ditu bere ibilbide luzean zehar, jubeniletan hasita. Gogoan izan behar da, besteak beste, 1985-86 denboraldian Ohorezko Mailako liga sortu zenean Real Sociedad taldeak lortu zuela aurreneko titulua. Erreginaren Kopa ere bitan.
Urrea Bartzelonako Joko Olinpikoetan
Unerik gogoangarrienetakoak 1992an Bartzelonan egin ziren Joko Olinpikoetan bizi izan zituen Mari Ayestaranek. Berak entrenatzen zuen Espainiako selekzioak, hain zuzen, urrezko domina lortu zuen. Mari Ayestaranen gidaritzapean, Teresa Motos, Nagore Gabellanes eta Maider Telleria izan ziren lepotik urrezko domina olinpiko bat zintzilikatu zuten aurreneko emakume gipuzkoarrak.