Energia Astean buru belarri sartuta dago Hernani eta gaur bigarren ekintza, argindarraren faktura ulertzeko tailerra, izango da. 19:00etan, Biterin, Goiener kooperatibak azalduko du nola aurreztu potentzia eta nola optimizatu energiaren komertzializatzailea. Goienerreko tailerra euskeraz izango da eta interpretazio zerbitzua jarriko du Udalak.
«Energia Aste hau Udalean eskuartean dugun Energia Iraunkorrerako Plangintzarekin lotuta dago. Iazko azaroan hasi ginen plangintza hori lantzen eta martxoaren bueltan bukatzea espero dugu», nabarmendu du Mattin Aldaia Ingurumen zinegotziak.
Bihar, hitzaldia 19:00etan
Energia Astearen hirugarren eta azken ekintza energia eraginkortasunari buruzko hitzaldia izango da. Gure etxebizitzetan energia aurrezteko aholkuak emango ditu Uhin taldeak. Hitzaldia bihar, ostegunean, izango da 19:00etan, hau ere Biterin.
Uhin taldeak azalduko du nola eta zeren arabera aukeratu argiteria eta etxetresna elektriko eraginkorrenak, berokuntza sistema eta galdara motak azalduko dituzte, nola erabili daitekeen bioklimatika energia beharra murrizteko.
Aldaiak gogorarazi duenez, «herri batek duen edo nahi duen jendarte mota eredu energetikoarekin erabat lotuta dago. Gainera, energiaren sektoreak izugarrizko eragina du ingurumenean eta energia ereduaren arabera lortuko dugu ala ez garapen sozio-ekonomikoaren eta ingurumenaren arteko oreka».
Europar Batzordeak plazaratutako Energiaren inguruko Alkateen Ituna da Udal plangintzaren oinarria. Horren planteamendua da mundu osoan negutegi efektuari aurre egin nahi badiogu, mundu osoko herrialdeetan politika koordinatua egin behar dela, herrialdeen gobernuetatik hasita eta udaletaraino.