Inguruko herri batzuetara baino lehenago iritsiko dira ihauteriak Aranora. Datorren larunbatean, gaur zortzi, eginen dituzte, urteroko planari jarraituz. Hala, goizeko 08:30etan abiatuko dira zomorroak puxka biltzera, eta herritarrek elkarrekin bazkalduko dute, baserriz baserri ibili ondoren.
Surotik, baserriz baserri
Aurreko urteetan bezalaxe, Suro izanen dute aranoarrek topaleku; bertatik hasiko dute buelta 08:30etan.
Surotik hasita eta Izer eta Alabier trikitilarien laguntzaz, auzoz auzo ibiliko dira: Surotik Arranbidera joanen dira gero, Benta Berri zeharkatuko dute segidan, Beheko Herri ondoren, eta azkenik, herrian bukatuko dute puxka bilketa. Bukaera arratsaldeko 15:00ak aldera izanen da; orduan joanen dira denak soziedadera bazkaltzera.
Bertan bazkaldu ahal izateko, Kontsejun eman behar da izena, lehenbailehen.
Herri afaria, eguna bukatzeko
Gauean, festarekin jarraitzeko aukera izanen dute aranoarrek, herri afarian. Urtero bezala, soziedadean eginen dute, eta festa giroa, alaitasuna eta kantuak ez dira faltako, bertan.