ihauteriak iritsi dira Aranora inguruko herri batzuetara baino lehenago. Gaur ekitaldi desberdinak antolatu dituzte urteroko plana jarraituz. Hala, goizeko 08:30etan abiatuko dira zomorroak puxka biltzera, eta herritarrek elkarrekin bazkalduko dute, baserriz baserri ibili ondoren.
Surotik, baserriz baserri
Aurreko urteetan bezalaxe, Suro izanen dute aranoarrek topaleku; bertatik hasiko dute buelta 08:30etan.
Surotik hasita eta Izer eta Alabier trikitilarien laguntzaz, auzoz auzo ibiliko dira: Surotik Arranbidera joanen dira gero, Benta Berri zeharkatuko dute segidan, Beheko Herri ondoren, eta azkenik, herrian bukatuko dute puxka bilketa. Bukaera arratsaldeko 15:00ak aldera izanen da; orduan joanen dira denak soziedadera bazkaltzera.
Bertan bazkaldu ahal izateko, Kontzejun eman behar da izena, lehenbailehen.
Zahagi Dantza, 17:00ak aldera
Ordu zehatzik gabe, baina 17:00ak aldera, pasa den urtean bezala, Zahagi Dantza eginen da aurten ere. Orduan Zahagi Dantzaren testigua hartu zuten herriko haur eta gaztetxoek. 5 eta 14 urte bitartekoek egin zuten dantza, eta erdiko pertsonaiak ere, herriko bi mutikok antzeztu zituzten: aurten ere horrela izanen da.
Egunean zehar animatu ohi dituzte bi herritar, Zahagi Dantzako antzerkia egiteko, baina iaz, ez zen heldurik irten, ez zegoelako perfil horretako inor. Belaunaldi baten falta nabaritu du Aranok. Bazkalostean, ordea, galdezka hasi ziren haurrak, Zahagi Dantza ez ote zen eginen, eta zergatik. Orduan, haur eta gaztetxoak bildu ziren hitz egiteko, eta bi mutiko kozkorrenak animatu ziren erdiko pertsonaiak antzeztera. Gaur ikusiko da nork antzeztuko duen aurten, baina printzipioz haurrak izanen dira.
Herri afaria, eguna bukatzeko
Gauean, festarekin jarraitzeko aukera izanen dute aranoarrek, herri afarian. Urtero bezala, soziedadean eginen dute, eta festa giroa, alaitasuna eta kantuak ez dira faltako, bertan. Eta afal ondoren musika ez da faltako trikitilarien partetik. Bihar, Kontzejun, umeentzat txokolatada eta futbolin lehiaketa antolatu dira 17:00etatik aurrera.