Martxoaren 19an egingo du Gure Esku Dago-BagaGiltza mugimenduak herri galdeketa, Astigarragan eta Hernanin.
Hori horrela, Astigarragako taldeak eskerrak eman nahi izan dizkie orain arte prozesuan lagundu duten guztiei.
Azken txanpan
Herri galdeketarako bidean azken hilabetean sartzeko puntuan gaudela nabarmendu du, hain zuzen, taldeak. «Hilabete besterik ez da falta horrenbeste desio, espero, amesten dugun eguna iristeko!». Bide horretan «Hernanirekin elkarlanean astigartarrok taldea osatu» izana azpimarratu dute, eta ibilbidea ez dela makala izan.
Baina bide horretan, astigartarren erantzuna eskertu du. «Batzuetan maldan gora, besteetan behera... Baina beti aurrera. Talde txikia izan arren, antolaturiko dinamika eta jaialdietan jasotako herritarren erantzunari esker, aurrera egin dugu eta martxoaren 19an astigartarrok erabakitzeko eskubidea gauzatuko dugu».
Izena emateko aukera, irekita
Era berean, eskerrak eman dizkie taldeak «prozesu eder honetan zuen hondar aletxoa ipini duzuen astigartar guztiei». Eta horrekin lotuta, kanpainan edota galdeketa egunean laguntzeko prest daudenei ere, dei egin die, izena emateko, guresku.astigarraga@gmail.com helbidera idatzita.
«Gogoratu», azaldu dute; «martxoaren 19an erabakitzea erabaki dugu. Guztion esku dago!».