Familia osoarentzat plan borobila izango dute gaur herritar gazte eta helduek: Zuhaitz Eguna. 53garren edizioa izango da aurtengoa, eta azkeneko urteetan bezalaxe, Aparrain mendiko lurretan egingo dute.
460 zuhaitz, prest
Gaur landatuak izan daitezen, 460 zuhaitz prestatu ditu Udalak gaurko. Horien artean, 300 pagoak dira, eta beste 160ak, bertako haritzak dira.
Oinez edo autobusez
Aparrain mendian pasako dute eguna, beraz, Hernaniko familia askok; goizean goiz abiatu, zuhaitzak landatu eta hamaiketakoa eginda, bueltatuko dira herrira.
Batzuk oinez egingo dute Aparrainerako bidea; beste batzuek, aldiz, autobusez.
Mendiriz Mendiko kideekin batera egingo dute bidea oinezkoek. Horiek, goizeko 07:30etan abiatuko dira Ugaldetxorantz, Plazatik.
Autobusa, berriz, goizeko 09:00etan abiatuko da Hernanitik; 09:05etan egingo du geldialdia Ereñotzun. Ugaldetxon egingo dute topo denek, eta Aparrainera oinez igoko dira.
Hamaiketakoa, Aparraingo bordan
Aparrainera iritsi bezain pronto hasiko dira zuhaitzak landatzen: atxurra hartu, zuloa egin, eta basozainak eskainitako zuhaitza lurperatuko dute.
Ondoren, Aparraingo bordara joango dira, eta bertan egingo dute hamaiketakoa.
Eguerdiko 12:30ak aldera egingo dute buelta, eta horretarako ere, autobusa aterako da, Ugaldetxotik.