Ostiral honetan egingo da zozketa, iluntzeko 20:00etan udaletxeko Pleno aretoan, alokairu sozialeko erregimeneko babes ofizialeko zazpi etxebizitzak esleitzeko.
Zozketan parte hartzeko onartuen zerrenda udaletxeko webgunean, www.astigarraga.eus, ikusi daiteke.
Zozketa, hiru taldetan
Guztira 7 etxebizitza zozketatuko dira, dagokien garaje eta trastelekuekin, baina hiru taldetan banatuta egingo dira zozketa horiek.
Bi etxebizitza, babes bereziko gizarte-egoeren taldean zozketatuko dira; bi logelako etxe bana, bat egokitua eta bestea ez. 25 lagun daude multzo honetan izena emanda.
Bigarren multzoan, gazteenenean, bi logelako etxebizitza bat eta hiruko beste bat zozketatuko dira, 19 lagunen artean.
Azkenik, hirugarren multzoan, hiru kide edo gehiago dituzten bizikidetza-unitateenean, hiru gelako hiru etxebizitza zozketatuko dira, 13 lagunen artean.
Zozketa honetan, hala egokitzen zaionari dagokion etxebizitza esleitzeaz gain, itxaron zerrendak ere osatuko dira.