Inauteriak ospatuko dituzte hernaniarrek datorren astean, hilaren 24tik 28ra bitartean. Baina hasiera ofizialaren aurretik, ezinbesteko bi zita izango dira asteburu honetan: iñude eta artzaien irteera, batetik; eta Hernaniko Musika Bandaren kontzertua, bestetik.
Iñude eta artzaiak, goiztiarrenak
Urumea ikastolako gaztetxoak izango dira herriko kaleak girotzen aurrenak. Goizeko 11:45etan egingo dute irteera ikastolako patiotik konpartsako protagonistak, iñudeak eta artzaiak, eta beste kide guztiak: globeroak, piruleteroak, barkileroak, umezainak, alkatea, sendagileak, erizainak, zapata garbitzaileak... Eta denak egingo dute kalejira Urumea txarangaren eta danborradaren erritmora.
Musika Bandak, testigua
Plazan bukatuko du kalejira Urumea ikastolako konpartsak, eta bertan egingo dute bat Hernaniko Musika Bandarekin, 12:30ak aldera.
Iñude eta artzaien antzezpena eta dantzaldia bukatzean, eguerdiko 12:45etan, hasiko du Hermubak inauterietako aurreneko kontzertua, udaletxeko aurkupeetan.
Herriko musikariek aurreratu dutenez, «Tolosako melodia ezagunez» osatutako emanaldia izango da, eta beraz, «ez da harritzekoa entzulegoak bere txaloekin jarraitzea abestien erritmoak edota entzulego animatuagoren bat dantzan hastea».
Izan ere, garai batean, Tolosako inauterietako melodiak oso ezagunak egin ziren Hernanin, herri horretako txarangak maiz izaten zirelako San Joanetan, kalerik kale.
Bigarren kontzertua, hurrengo ostiralean
Ez da, ordea, inauterien bueltan egingo duten emanaldi bakarra. Datorren ostiralean, iluntzeko 20:00etan, Italiara bidaiatuko dute entzuleek. Milagrosan izango da hori, eta bertan izango da, beraiekin batera, Tino Martini abeslari italiarra, Toscanako txoritxoa ezizenarekin ezagunagoa dena.