Bigarren astez jarraian Mundarro Petritegik etxean jokatuko du goiko postuetan dagoen talde baten aurka. Donostiako Deustoren kontra neurtuko dituzte indarrak gaur, arratsaldeko 16:00etan hasita, etxean bertan, Zarkumendegiko futbol zelaian.
Zazpi jardunaldi egin zituen taldeak partidurik galdu gabe, baina pasa den astean Trintxerpek Mundarroren bolada onarekin amaitu zuen. Mundarroko mutilen Preferente mailako taldeak berriz ere bide hori berreskuratzea izango du helburu gaurkoan.
Ez da erraza izango Deustok talde ona baitu. Aurkari zaila da Zarkumendegin ikusi ahal izango dena. Hala ere etxean jokatzen du Astigarragako taldeak eta abantaila hori baliatu behar du.
Deusto laugarren dago kokatuta sailkapen nagusian 31 punturekin. Mundarro Petritegi berriz, 13garren 19 punturekin. Donostiarrek galdu egin zuten azken jardunaldian Añorga liderraren aurka, baina aurreko sei partiduetatik bost irabazi zituzten eta bat berdindu. Beraz sasoi onean dago Deusto.
Saskibaloi taldeak etxetik kanpo
Saskibaloiko taldeek kanpoan jokatuko dute asteburu honetan. Mutilen talde nagusiak gaur du txanda Donostiako Paco Yoldin, 20:00etan Askatuaken aurka.