Hamar urte dira aurten, Goiz Eguzki abesbatza sortu zela. Hamar dira kantuan daramazkiten urteak, eta hamaika, urte guzti hauetan eskainitako doinuak, kantatutako abestiak.
Eta hori ospatzeko, prestatu dituzte hiru emanaldi berezi, Bestelako musikak eta gainerako festak izenburuarekin.
Herriko talde artistikoak, gonbidatu bereziak
Ospakizun honetara, gonbidatu nahi izan dituzte, herriko talde artistikoetako batzuk, «oso ezagunak ez direnak», azaldu dutenez: «horietako batzuek, ez dute inoiz jendaurrean emanaldirik eskaini, eta beraien artea, entsaioetarako lokalaren pareten artean bakarrik adierazten dute».
Horregatik, beraietaz gogoratu eta hiru emanaldi berezi horietara gonbidatu nahi izan ditu Goiz Eguzkik.
Aurreneko emanaldia, ostiral honetan bertan
Otsailetik apirilera bitarte izango dira hiru emanaldiak, hilabete bakoitzeko bat, guztiak Goiz Eguzki egoitzako eszenatokian. Eta aurrenekoa, ostiral honetan bertan izango da, otsailaren 17an.
Arratsaldeko 19:00etan hasiko da emanaldia, eta bertan elkartuko dituzte, herriko hainbat bakarlari, musika tresnez lagunduta, eta akordeoilarien laguntzaz. Zehazki, emanaldian ariko dira Nuria Barba, Ixiar Zubimendi, Tomas Garmendia, Karlos Sanchiz, Imanol Kamio eta Doinu Zaleko ikasle eta akordeoi orkestra.
Goiz Eguzkin izango dira hiru emanaldiak, arratsaldez. Eskainiko dituzte kantua, musika eta monologoak.
Doinu Zalekoek, varieteak eskainiko dituzte, aurrena; eta ondoren, gainerakoak igoko dira taula gainera, tangoak eta lirika eskaintzera: Alfonsina y el mar, El día que me quieras, La ci darem la mano...
Bigarren emanaldia, berriz, martxoaren 10ean izango da, eta bertan egongo dira, arratsaldeko 19:00etan hasita, Hernani Musika Eskolako Helduen Taldeko kideak. Instrumentu desberdinekin, makina bat obra eskainiko dituzte; horietako lau, Xabier Odriozola hernaniarrarenak.
Monologoak, bukatzeko
Eta hiru emanaldietan azkenekoa, apirilaren 5ekoa, desberdina izango da. Musikatik antzerkira egingo dute salto. Iluntzeko 20:00etan hasita, monologo saioa eskainiko dute, Kamen Mendiolak zuzenduta, Goiz Eguzkiko hiru antzezlek: Ainhoa Pineda, José Luis Gómez eta Ixiar Gurmendi.
Beraiek sortutakoak izango dira hiru monologoak: La reina de Cincinnati y su ukelele, Don Juan Resucitado, eta Uxue Adarrako Sorgiña.