Ekainaren 18an eginen du Gure Esku Dagok herri galdeketa Mendialdeko herrietan, tartean Goizuetan eta Aranon, eta ordura arteko bidea girotzeko, iragarri dute hainbat ekintza eginen dituztela. Horietako bat eginen dute gaur arratsaldean Goizuetan.
«Goizuetarrok ere hemen gaude!»
Gaur arratsaldean Goizuetan eginen den festarekin, aldarri argia eraman nahi dute kalera: «Goizuetarrok ere hemen gaude!».
Arratsaldeko 17:00etan hasiko dira ekintzak eskolako atarian. Denetarik izanen da bertan, adin guztietako herritarrentzat: mural margoketa umeentzat, eskulanak, txokolatada, dantzaldia eta argazki murala. Ekintza irekiak izanen dira denak, eta bertaratzen den edozeinek hartu ahal izanen du parte.
Gauerako, ordea, Herri Afaria antolatu du Mendialdeko Gure Esku Dagok. Umore Ona elkartean izanen da, gaueko 21:30etan hasita, baina aurretik txartela erosi behar da, afariaz gozatu ahal izateko.
Galdeketaren alde sinatzeko aukera, ere bai
Horietaz guztietaz aparte, Mendialdeko Gure Esku Dagok azaldu duenez, sinadura-bilketa ere eginen dute gaurko festan.
Ekainaren 18rako dago aurreikusia herri galdeketa Mendialdeko herrietan, hau da, Goizueta, Arano, Leitza, Areso, Araitz, Betelu, Larraun eta Lekunberrin. Dena den, legeak ezartzen duenaren arabera, herritarren arteko gutxiengo sinadura kopurua beharko du Gure Esku Dagok herri galdeketa hauek antolatu ahal izateko.
Hain zuzen, 16 urtetik gorako biztanleen %15aren sinadura beharko dute Goizueta eta Aranoren kasuan: 96, Goizuetan; eta 15, Aranon.
Hainbat ekintza, ekainera bitarte
Galdeketari bidea egiten hasteko, eta Mendialdea girotzeko, ekintza desberdinak egiten hasiko da Gure Esku Dago inguruko herrietan. Hori da, hain zuzen, gaur Goizuetan eginen dutena.