Zita inportanteak dauzkate bihar, pelotari hernaniarrek. Eta Hernanin bertan dauzkate horietako bi, Euskal Herriko Txapelketakoak.
Aurrena, maila haundiko partidua izango dute, elite mailakoek, goizeko 11:00etan. Ojuelek eta Aizpitartek, aurrean izango dute, oraindik partidurik galdu ez duen bikote azpeitiarra, Ilunpe taldeko Etxaniz eta Murgiondo.
Eta segidan, bigarren mailakoa jokatuko dute Urkizuk eta Labakak, Paz Ziganda taldeko bikote nafarraren kontra. Irabazi beharreko partidua dute hernaniarrek, finalerdietara sailkatzeko aukerak mantendu nahi badituzte.
Lazkano eta Arizmendi jubenilek ere, zita garrantzitsua daukate Gaskan, Urnietaren kontra. Izan ere, irabaziz gero, semifinalak jokatzeko sailkatuko dira, trinketean.
Bost partidu, gaur bertan
Beste hemezortzi partidu jokatuko dituzte pelotari hernaniarrek, asteburu honetan. Eta horietako bost, gaur bertan izango dira. Hernanin jokatuko dira bi, iluntzeko 20:00etan hasita: Uitzi eta Oiartzabal infantilak, Lapkeren kontra; eta Tejedor eta Lasa kadeteak, Epleren kontra.
Jara-Etxarri, berriz, Villabonan ariko dira 18:30etan; Apaolaza-Insausti II, 20:30etan Zestoan; eta Garmendia II-Balenciaga, 19:30etan Errenterian.