Ez da bertso eta gutiziarik faltako aurten ere! Basque Culinary Centerren, otsailaren 17an jarri du zita Kronikak, Insalusen laguntzarekin, Bertso Gutiziak saio bereziaz gozatzeko. Arratsaldeko 19:00etan hasiko da, eta bi zati izango ditu.
Aurrena, bertso saio ederra eskainiko dute, punta puntako lau bertsolarik: Maialen Lujanbio, Andoni Egaña, Unai Agirre eta Iker Zubeldia izango dira bertan, saltsa jartzen. Aitor Mendiluzek emango dizkie osagaiak, gai-jartzaile lanetan.
Eta ondoren, gutiziaz betetako luntx-afaria izango da, BCCko ikasleen eskutik. Mokadu goxo eta bereziak prestatuko dituzte, denen gozamenerako.
Sarrerak, dagoeneko salgai
Bertso saioaz eta afariaz gozatzeko, sarrerak salgai daude, 20 euroan, bailarako hainbat puntutan: Hernanin, Kronikaren bulegoan, eta Kixkal eta Aralar tabernetan; Ereñotzun, Irrintzi tabernan; Goizuetan, Amaia kafetegian; eta Astigarragan, Ikatza tabernan.
Aurten, gainera, autobusa izango da doan, Hernanira bueltatzeko, 23:30etan.
Sei sarrera bikoitz, zozketan
Eta sarreren zozketa ere egingo dute Kronikak eta Doberak! Sei sarrera bikoitz zozketatuko dituzte, ostiral honetan, irakurle eta bazkideen artean.
Horietako bi, Facebooken albisteari atsegin dut eman eta elkarbanatzen dutenen artean; beste bi, gaiarekin lotutako bertso bat idatzi, eta web orriko iruzkinetan edo Kronikaren bulegoan uzten dutenen artean; eta azkeneko biak, Dobera-Kronikako bazkide-laguntzaileen artean.